Monday, June 6, 2016

पावसाच्या सरींमध्ये तुझ्यासाठी भिजताना

आज कित्येक महिन्यांपासून
अडगळीत राहून कोंदटलेले
सारे श्वास मोकळे झाले
गर्रकन गोलाकार फिरताना मला पाहून
माझे खुललेले हवे तसे रूप पाहिले
अन तुझ्या चेहर्‍यावरचे चिंतेचे सावटच दूर झाले

ऊन बरसणार्‍या निरभ्र आकाशात
सावळ्या मेघांची आज गर्दी झाली
ढोल ताशांच्या अजब स्वागतात
पावसाची पुन्हा हासत वर्दी आली

आज मीही नव्याने बाहेर पडेन
आकाशातून बरसणारे मोती झेलण्यासाठी
घोंगावणारया वारयासोबत खूप भांडेन
तुझ्यासोबत असणारे गोड नाते जपण्यासाठी

माझ्या अंगाला असलेला ऊबट वास आज
भिजलेल्या मातीच्या कस्तूरीत विरुन जाऊ दे
क्षणाक्षणाला भिजताना गाली दाटणारी लाज
या सृष्टीत विरुन रंग माझा अधिकाधिक खुलू दे

डबक्यानी भरलेल्या आडवाटेवरून चालताना
सांभाळणारया तुझी तू मुळीच काळजी करू नकोस
जोपर्यंत आहे तुझ्या हातात माझा हात
पावसाच्या सरींमध्ये तुझ्यासाठी भिजताना
आनंदणारया माझी तू मुळीच काळजी करु नको
तोपर्यंतच तर ही 'छत्री' राहील तुझ्या सहवासात

- रुपाली ठोंबरे.

1 comment:

Blogs I follow :