तो खंबीर किंवा कमकुवत नसतो
तर तो एक क्षण कमकुवत असतो
जीवनातला असा एक क्षण
जेव्हा प्रत्येक दिवा मालवलेला वाटतो
जरी असेल सर्व सुखांचें लोळण
तरी दुःखाचा एक धागा ताणून धरतो
जीवनातला असा एक क्षण
प्रत्येकाच्याच जीवनात कधीतरी येतो
उद्याची चिंता अन कालचे व्रण
मनाच्या द्विधावस्थेत जीव त्रस्त होतो
जीवनातला असा एक क्षण
जिथे व्यक्तीचा सहवास हवासा असतो
मनावरचे एक असे दडपण
जिथे आशेचा एक शब्दही कामी येतो
जीवनातला असा एक क्षण
जो कायमची कलाटणी देऊ शकतो
प्रत्येकालाच प्रिय आपला प्राण
असे असतानाही का असा निर्णय घेतो ?
जीवनातला असा एक क्षण
जो जिद्दीने पार पडता खूप शिकवून जातो
असेच आहे जीवनाचे हे रण
जिथे एक बदल हरलेली बाजी जिंकून देतो
जीवनातला असा एक क्षण
तुमच्याही प्रियजनांच्या आयुष्यात असतो
संवादाने दूर करू तो क्षण
कारण प्रत्येकालाच जवळचा हवा असतो
- रुपाली ठोंबरे.
